[Bintang Timor no.39 1865 (17 Mei 1865), p.3]

Tjrita-an dari satoe Letenant Djawa

Siapa njang soeda kenal pada Saridin, koetika dia djadi Sersant, dan orang trada nanti mingarep lain onder opsir di dalem dia poenja kompeni. Siapa orang njang trada soeka kapada soldadoe Djawa, djika dapet enget kapada Saridin lantas engetannja berobah, sebab orang trada bisa bilang njang Saridin trada bolee terpakee per satoe orang militer.

Ja, tetapi ini Saridin trada bolee di toeroetken, dan moesti di lainken.

Ini Saridin boekannja satoe pengatjoewilan, tetapi dia ada satoe tjoonto; dia poenja sikap, kalakoe-annja dan adatnja, ini samoeanja ada bagoes sekali per satoe orang soldadoe; soldadoe njang ada di bawah printahnja Saridin samoeanja ada menghoendjooken segala kemadjoean, tiada seperti njang lain lain; bolee liat njang ini orang orang njang soeda di pertjajaken kapada Saridin, samoeanja pengartiannja lantas tjepet sekali.

Saridin ada satoe orang sedeng besarnja, tetapi dari sebab di soeka berjalan dengen angkat kapala, mangka itoe orang poenja pengliatan njang dia tinggi sekali, rambootnja slamanja mengkilap dari sebab Saridin saben hari soeka pakee minyak klapa sarta brengoosnja di djaga dengen segala ati-ati.

Pakaiannja slamanja bresi dan sepatoetnja, (krana sebab dia soeda dapet permisi per bolee pakee) ada dengen segala kabresian. Djikaloe kita orang mengliatken djalannja betool betool, lantas bolee dapet taoe njang dia poenja djalan seperti kapaksa, sebab dia memangnja satoe orang djawa sarta trada biasa pakee sepatoe.

Di dalem dienst saben sabennja dia bisa menghoendjooken tjajaan seperti satoe orang militer; kapan dia maoe kasi rapporttan kapada opsir djaga, dia lantas berdjalan kemadjoe dan berdiri 2 atawa 3 djangka dengen angkat tangannja bawak di klepnja topi sarta barkata ,,aspresent” (semoeanja ada betool;) djikaloe kita orang liat dia poenja djalan, waktoe dia bawak rapportan, lantas kita orang soenggoe pertjaija dan kira njang dia ada bawak kabaran perloe sekali.

Banjak opsir njang moeda-moeda lantas bertoendook djikaloe mengliatken Saridin poenja mata; trada sentara njang baroe liwat 10 taoon poenja lama, Saridin waktoe misik djalan telandjang tepoeter di dessa dengen doedook di atas karbonja, njang dia tjientai, per bawak dari sawah di ka tempat mandinja (kobak) njang lain lain kerbo djoega ada brenti di sitoe, dengen bikin dingin badannja di dalem itoe loempoor (kobakan.)

Sekarang besaar sekali itoe pertandingan, djikaloe kita orang enget ini anak njang doeloe ada idoop seperti satoe kerbo, dengen sekarang soeda djadi sersant.

Koetika Saridin oemoornja 15 taoon, dia lantas kena pakerdja-an Goperment dan moesti djadi koeli. Itoe katjilaka-an memangnja maoe dateng, sebab itoe dessa njang dia tingali kabetoelan ada di sebelahnja djalanan besaar njang dari Samarang ka Ambarawa; saben ada dateng printahnja demang, per pikool dan bawak barang barangnja Olanda, (banjak banjak barangnja orang militer njang maoe pigi ka lain negri). Di dalem satoe paal Saridin trima 2 doewit, baliknja kembali (sebab poelang dengen kosong) dia trada dapet baijaran.

Moelainja sekali koetika dia pigi di Samarang, dia trada ambil perdoeli dari itoe pembaijaran, krana sebab di liat di kotta barang aneh aneh dan bagoos sekali, toko toko dan lain lainnja, njang di di dessa trada bisa dapet liat ini samoeannja, mangka itoe dia lantas sebetaran loepa samoeanja. Djikaloe di dapet liat satoe waroong njang orang bolee dapet segala roepa makanan dan dia lantas tarik iket piengannja lebee keras sedikit oetawa di toeroot makan sama temen temennja njang misi ada doewit sedikit. Satoe waktoe ada satoe toewan soeda tahan pada dia per bawaken satoe pikoelan dari satoe gang ka lain gang, dengen dia heiran sekali koetika itoe toewan kasi pada dianja 25 Cent boewat oepahannja; sebab ini opahan ada lebee banjak dari itoe oepahan njang dia trima dari kompeni per djalan dengen memikool dari dessanja sampee di Samarang.

Koetika dia sering sering di pangil dengen kena pakerdja-an Goperment sarta trada bisa liat itoe barang aneh aneh ladi, lantas dia baroe brasa njang pembaijaran 2 doewit per satoe paal ada telaloe sedikit sekali, sarta dapet itoe pengartian njang satoe kali djalanan soeda moesti mendjadiken dia poenja kamelaratan, satoe kali Saridin soeda tjapik sekali dengen doedook di bawah bajang bajanganja satoe waroong njang betool ada sabelahnja tangsi dengen piloelannja di tarooken sebelahnja. Dia poenja satoe saroong njang ada baik sedikit dia doeloe soedah djoewal pada orang waroong per 50 doewit dengen ingettan dari dapet pembaijaranja maoe di teboosken kembali, tetapi sebab dia kira kira njang pendapetnja trada tjoekoop per kerdja meneboos itoe kain, dia lantas kerdja main doewitnja dengen soeda abis kalah samoeanja bersama sama badjoenja. — Dari katingalanja barang barangnja melingken tjoema ada satoe saroong toewa betool sampee per toetoepi dia poenja piengang.

Sekarang dia bediri dengen ampir telandjang di sebalahnja itoe waroong.

Bermoela dia doedook di balee balee njang ada di dalem itoe waroong, tetapi koetika ada orang orang sokdadow pigi masook di itoe waroong, dia lantas pigi laloe per kasi tempat pada dia orang.

Itoe waktoe panans soengoe, matahari naek lebee lama lebee tiengi melingken di bawah empernja itoe waroong ada sedikit baijang baijangan.

Saridin brasa sakit dengen tjilaka.

[Bintang Timor no.41 1865 (24 Mei 1865), p.4]

Doewa tinda dari dianja, dia mengliat Nasi, Saijoor. Boeboor, Pisang goreng, Manggis, Doeren dan lain lainnja; ini samoeanja dia moesti mengliatken sadja, dengen perootnja telaloe laper soenggoe.

Di dalem satoe daoon Pisang njang itoe orang soldadoe soeda pakee boewat piring (pintjook) ada djatooh di sebelahnja. Di tekoek-anja itoe daoen misi ada katinggalnja satie doewa bidji nasi.

Saridin trada tahan lagi, lantas ambil itoe daoon dengen makan itoe bidji bidji nasi.

Satoe dari itoe soldadoe njang ada mengliatken Saridin poenja perboewattan, lantas berkata, ,,Kaja andjing” (seperti andjing.)

SARIDIN MENJAOOT ,,LAPER.”

Laper dan trada oewang! kenapa trada djadi soldadoe? Per djadi soldadoe ini Saridin beloon taoe ada ingettan sekali kali. Dia soeda idoop, pagimana satoe orang djawa moesti idoop, dengen trada pikeer per di blakang kalinja. Dia djoega soeda inget, temtoe enak sekali kapan orang bolee djalan di bawah paijoong prada oetawa doedoek di atas satoe koeda bagoos, dan lebee enak lagi djikalook orang trada moesti memikool barang Kompeni dengen slamanja dapet banjak nasi; tetapi per tjari lain akalan njang bolee mendjadiken dia poenja kesenengan per ganti kaidoopanja njang soesa sekali, ini Saridin slamanja beloon taoe berpikeer.

Apa itoe soldadoe trada moesti pikool barang barang?

Ini trada dan slamanja trada.”

Slamanja trada?

Slamanja trada! dengen slamanja ada nasi dan oewang.

Siapa njang kasi itoe oewang pada soldakoe soldadoe?

Kompeni.

Apa roepa pekerdja-an kita moesti bekin per Kompeni?

Djaga, baris dan pigi prang, djikalook ada.

Per djadi soldadoe ada satoe kahormattan.

Dari ini samoeanja soeda mendjadi seperti satoe tali teriket di pingangnja dengen trada bolee lebee di kentjengken lagi.

Itoe soldadoe soldadoe isep dengen sjawat bidji bidjinja itoe Doerin, njang ada di itoe waroong.

Satoe dari ini soldadoe lantas berkata kapada Saridin:

Djikalook kowee maoe djadi soldadoe, dan kowee bolee makan bebrapa soekanja dengen saija poenja tangoengan.

Dari koewee poenja oewang panas (handgeld) nanti kowee bolee baijar kembali pada saija.

Koetika Saridin denger ini perkata-an, lantas dengen lekas dia bediri serta doedook di bankie (balee balee), tangkep itoe makanan seperti satoe andjing dessa njang tlaloe laper sekali; sasoedanja dia abis makan lantas dia soeroe toentoon dirinja pigi di tangsi.

Ada njang lantas kedjadian atas dirinja, dari ini dia trada taoe apa apa; dia soeda di bawak di tempatnja satoe toewan serta di bawak lagi kapada lain toewan, dengen orang trada maow liat njang dia moesti doedook di tanah (Sebo). Toewan njang kasatoe bediriken dia dengen troos di deketnja satoe paal dan soeda dapet seneng hati atas tinginja (dedeknja); njang lain toewan lantas pigi priksa badanja, di bekin betool seperti satoe koeda njang maoe di djoewal; masing masing lantas toelis di atas sepottong kertas, serta di kasiken pada itoe soldadoe njang anter pada Saridin.

Malem Saridin dapet lagi banjak makanan dengen satoe tiker per dia bolee tidoor di atasnja. Doewa kali dia kaget sebab tamboor poenja boeni dengen pagi pagi tamboor beboeni lagi, satoe pertanda-an njang orang orang trada boelee tidoor lagi.

Pagi pagi Saridin lantas di bawak di tempatnja kandjeng toewan Resident, disitoe dia di tanjaki namanja, dengen dessanja; sasoedanja ini, di lantas toeloong bekin bresi (sapoe sapoe) kamarnja Sersant Majoor, dan dari ini pakerdja-an dia di kasi doewa kali nasi, dendeng dengen saijor sarta hatinja lantas seneng soenggoe.

Lain hari pagi ada satoe soerat dateng dari toewan Resident, Sersant Majoor lantas pigi doedoek di hadeppanja medja toelis, dengen soeroean pangil satoe Sersant djawa serta moelai batja dari perkara di oesir seperti bangsat trada hormatnja, gantoong, dan pasang mati; tiap tiap kali apa njang soeda di batja lantas itoe Sersant djawa mengertiken pada Saridin; abisnja satoe satoenja bab lantas Saridin di tanjaki: Mengerti? Di atas itoe pertanjakan samoeanja betool Saridin tida mengerti, lagi dia trada denger betool, sebab banjak soldadoe njang itoe waktoe baroe baris di loewar serta tamboor sering sering beboeni, sebegitoe djoega Saridin menjaoot dengen hormat atas satoe satoenja pertanjakan:

,,Inggeeh.”

Koetika itoe pertanjakan soeda abis, Sersant Majoor lantas kasi penanja pada Saridin, sebab dia moesti teken itoe soerat; Saridin bilang njang dia trada bisa toelis, Sersan Majoor lantas bilang pada dianja serta di mengertiken njang dia moesti tarook satoe tanda tangan tjakar-aijam sadja (prapatan.)

Saridin sebab dia memangnja selamanja idoop beloom taoe beladjar toelis, lantas mengliat itoe penna njang ada di dalem tanganja dengen membri heiran pertarook satoe tanda kakie aijam; koetika Sersant Majoor dapet liat njang dia trada bisa teeken lantas dia di kasie prentah per pegang keras itoe penna; Sersant Majoor pegang tangannja Saridin serta toeloong tarooken itoe tanda prapattan. Sasoedanja ini, samoeanja lantas betool, Sersan Majoor ambil sinapannja sarta pigi kaloewar baris tamboor begitoe djoega lantas beboeni.

Sekarang orang kasi prentah pada lain toewan (Foerir) njang Saridin moesti toeroot pigi di goedang pakean.

Di sini dia trima banjak pakean, dia sendiri trada mengerti per apa goenanja begitoe banjak pakean. Badjoe, tjelana, topi, saroong, dasi, kantjing koeningan, sisier dan lain lain lagi, ini samoeanja dia moesti bawak di tangsi, satoe tiker dan satoe bantal dia dapet djoega dengen di toendjoeki satoe tempat di mana dia bolee tidoor.

Sasoedanja ini lantas satoe dari temenja dateng kasi pakee pada dianja, moelai ramboetnja di pottong, njang dia ada telaloe saijang soenggoe, dari ini, Saridin lantas tarik napas.

Liwat 1/4 djam Saridin soeda abis pakean seperti satoe soldadoe, bertambahan ada f 15: di dalem sakoenja.

[Bintang Timor no.42 1865 (27 Mei 1865), p.4]

Liwat 6 taoon Saridin soeda djaga begitoe baik sampee dia di naiken Sersant, dan mesoewoor soenggoe namanja. Doewa kali dia soeda pigi di peprangan; di dalem peprangan njang bermoela, Saridin di kasi satoe bintang boeat oepahan sarta tanda, krana sebab dia soeda toeloong pada kaptinnja njang ampir di boenoeh pada brandal.

Lain peprangan lagi, njang kadoewa kalinja, sebab kakoerangan opsir, kapala dari peprangan soeda ambik dan pakee satoe Sersant Ollanda, sarta di kasi koewasa per mamrintah 24 orang soldadoe (Sersant Saridin djoega toeroot teritoong di dalem ini 24 orang) boewat djaga satoe tempat di dalem itoe peprangan djoega. Tiada lama ini tempat pedjagan dengen kagettan lantas di kepoong pada brandal, ini pengepoengan begitoe keras, sampee soldadoe soldadoe njang ada di itoe tempat trada dapet djalan per bolee pigi lari.

Doewa kali dia orang soeda boebarken itoe brandal sampee 2 dari itoe 25 orang soeda djadi matinja dan 7 njang trada bisa beklai lagi sebab kena loeka; kommandantnja (itoe Sersant Ollanda) djoega soeda mati dan Saridin kena pelor di kakinja, tetapi dia trada ambil perdoeli sarta kommandeer (kasi perintah) teroos pada soldadoenja njang misi katinggalan di boewat seperti trada ada satoe apa apa.

Boewat madjoe lagi per tiga kalinja, itoe brandal brandal trada brani sarta koewatir, sebab soeda banjak dari dia orang njang mati dan njang dapet loeka, tetapi ini orang brandal lantas ambil lain atoeran sarta berembook per tinggal kepoong itoe tempat sadja.

Koetika soldadoe soldadoenja Saridin lebee lama lebee toeroon makannja, sarta trada lama kedjadian dia orang trada dapet makan satoe apa apa sebab makanan njang di sediaken soeda abis, Saridin lantas inget njang soldadoenja temtoe nanti molai soengoot (tjomel tjomel,) tetapi Saridin lantas ambil lain akalan sarta dia berkata kapada soldadoenja: ,,Siapa siapa dari kowee orang njang brani bitjara dari perkara telook, temtoe djadi satoe orang mati.”

Dari ini bitjara-an Saridin djoega pegang dia poenja perkata-an, sebab koetika lain malemnja brandal poera poera maoe madjoe lagi per ambil itoe tempat, di dalem itoe waktoe ada satoe dari Saridin poenja soldadoe lantas mengamook, sarta Saridin soeda lantas pasang mati ini soldadoe.

Doewa hari Saridin dengen orang orangnja trada makan satoe bidji nasik; dia ada bernanti katoeloengan tetapi trada ada njang dateng, mangka itoe dia hoendjook bertaoe kapada temen temennja sarta bitjara:

,,Besook pagi satoe djam di moekanja mata hari terbit (naek) kowee orang bolee pigi brangkat dan tjoba per bolee kaloewar dari pengepoenannja brandal;” sebab Saridin inget lagi, djikaloo soldadoe soldadoenja ati ati sedikit dengen trada boewang obat per tjoema, temtoe bolee keslametan. Dia, Saridin, dengen temen temennja njang dapet loeka keras nanti menoenggoe di dalem kamar obat, dengen pegang tali api menjalah, brandal poenja dateng.

Soldadoe soldadoenja koetika denger ini perkata-an lantas bilang pada Saridin (kommandantnja) njang dia orang dengen segala soeka hati maoe menoenggoe djoega lagi 24 djam poenja lama; kita orang bolee bilang per satoe kahormattannja orang soldadoe njang dia orang trada nanti maoe tinggalken kapalanja sendirian.

Itoe hari djoega lantas ada dateng katoeloengan, sarta soeda antem itoe brandal dari di blakang sampee djadi kalahnja; Saridin lantas dapet dari antara perboeattannja 1 bientang dari perak sarta 1 klewang kahormattan, dari Kangdjeng toewan besaar Goevernoor Djendraal. Dia poenja nama Djendraalnja dari peprangan soeda sebootken di dalam satoe soerat oendang oendang.

Soenggoe bolee di bilang njang ini kahormattan ada besaar sekalie, krana lagi djikaloo kita orang inget njang Saridin doeloe satoe anak ,,toekang angon kerboo.”

Apa dari ini gandjaran njang hadiat, perdameiken Saridin poenja karadjinan dengen ingin akan hormat; apa dia temtoe slamanja lekat pada Goverment sebab atas pekerdja-anja di gandjarri begitoe roepa?

Melingken dia poenja bini Saridin soeda taoe barang njang berlainan sekali.

[Bintang Timor no.45 1865 (7 Junij 1865), pp3-.4]

Sabagaimana hatinja satoe orang bangsa djawa njang ada adat sedikit, ini Saridin begitoe djoega koetika dia djadi soldadoe dia ambil ini Sarina boewat bininja, dan soeda slamanja bagi dia poenja gadji sarta lain lain pendapetannja sama sama, soepaia bolee idoop dengen seneng.

Ini Sarina djoega toeroot Saridin poenja hati, slamanja orang tiada bisa bilang satoe apa apa atas dia orang doewa poenja perboewatan oetawa kadjalannan di dalem tangsi. Djikaloo Saridin poelang dari baris oetawa poelang dari djaga (24 djam poenja lama) dia lantas bolee pigi mendi di kali oetawa tidoor 1 djam lamanja, krana sebab dia taoe djikaloo dia bangoon tidoor nanti temtoe pakeannja soeda brisi samoeanja.

Sarina bermoelanja tjoema idoop sama gadjinja Saridin, sarta dari kabentoengannja sendiri, terdapet dari tjoetji barang barangnja onder opsir dengen kopraal kopraal dari kompeninja, oetawa dari asilnja djoewalannja koewee koewee njang di soeka-ie soengoe oleh soldadoe soldadoe djawa dari antara batalioon. Koetika Saridin di djadiken sersant, Sarina begitoe djoega lantas dapet nama njai Sarean (sersant), mangka dari itoe Saridin tiada maoe liat lama lagi njang bininja moesti masak masak sendiri; Sarina ambil doewa oetawa tiga prampoen soldadoe njang bolee bekin dia poenja pakerdja-an, sarta dia njang djadi kapalanja atas dia orang.  Bersama sama kakoewasa-annja Saridin di atas kompeninja, Sarina begitoe djoega lantas dapet itoe keowasa di atas lain lain prampoean prampoean, slamanja Sarina njang memetoessi, tetapi perkara njang ada sedikit besaar, (seperti perkara tjemboeroean), samoeanja di bawak di hadepannja Saridin.

Djarang dari itoe orang orang njang dapet perkara tiada maoe toeroot Saridin poenja poetoessan oetawa perbilangan.

Lagi djikaloo Saradin poenja kompeni pigi ka peprangan, slamanja Sarina njang moesti djaga dan bekin betool tangsinja prampoean prampoean dan anak anak, sampee mendjadiken njai sersant majoor poenja ka marahan hati; sering ini njai sersant majoor bekin klagt pada njang koewasa, ,,apa njang djadi sebabnja dia tiada di kasi itoe kakoewasa-an, mangka dia ada lebee tinggi dari pada Sarina;” tetapi slamanja dia tiada bisa dapet kabetoelannja, krana sebab ,,dia poenja kelakoean haroes ditjelakan” (tiada baik djalannja).

Saben hari djikaloo bagi nasi, samoeannja ada dengen segala peratoeran njang baik sekali; saben pagi, djam 1/2 11, Sarina pigi priksa itoe kamar kamar (tangsinja prampoean dan anak anak) seperti satoe Djendraal; djikaloo Letenant Adjidant kasi taoe lebee doeloe dari datengnja, dan orang soeka hati sekali mengliatken di dalemnja itoe tangsi; Sarina bepakee bagoos sekali, sarta trima di moeka pientoe itoe Letenant poenja dateng, dengen memegang sapoe boeat satoe tanda dari martabatnja (pangkatnja), beserta menjaoot di atas itoe Letenant poenja pertanjakan, dengen perkata-an ,,as pesèn” (alles present oetawa samoeanja ada); beserta begitoe lekas ini Letenant masook di dalem tangsi, lantas Sarina betreak: ,,Ohdeh” (in Orde).

Waktoe itoe, itoe tangsi ada dengen segala kabresian, seperti satoe roemah njang maoe di boewat pesta; antara tiker soeda di goeloeng baik sekali sarta di tarooken di bawahnja bantal bantal; di satoe satoenja tempat ada palita menjalah (tiada sentara mata hari ada trang sekali), sarta di hadepannja satoe satoenja medja ada itoe prampoean njang ada tinggal di itoe tempat. Anak anak ketjil kita orang tiada bisa dapet liat, melingken djikaloo kita orang memandeng di bawah medja, dan baroe bisa dapet mengliat satoe doewa kapala goendool.

Dari ini samoeanya mengapa Saridin misi koerang trima atas dia poenja kaoentoengan? Apa Saridin bolee harep lebee lagi?

Saridin boekannja itoe koeli oetawa anak dessa lagi njang tiada ada ingettan, tetapi satoe orang njang soeda mengadjar memikir, mengadjar mengliat sarta mengadjar bertanding beserta molai tadjem ingettannja. Saridin soeda bisa dapet timpo dengan waktoe njang baik djikaloo dia djaga, per adjar lees dan toelees; dia toelees sendiri antara soeratnja rapport; dia djoega mengarti sarta bisa menjoerat bahasa Ollanda sedikit.

Lama Saridin soeda pikir, apa njang djadi sebabnja dari perbedahan njang besaar sekali njang ada di tengah tengahnja Ollanda dan Djawa.

Lama Saridin soeda pikir lagi, apa njang djadi sebabnja, ,,orang djawa di bekin lain dari bangsa orang Ollanda,” seperti dari makan, pakean dan gadjinja;

Trada lama Saridin lantas dapet katrangan njang ini perbedahan, trada bisa dateng, melingken dari roepanja koelit?

Kita orang tiada bolee djoesta njang orang djawa memangnja satoe orang bodo, djikalook di tanding sama orang Ollanda; tetapi orang djawa tiada slamanja tingal bodo; soldadoe toewa bisa dan bikeen dia orang poenja dienst (pakerja-an) lebeeh baik dari pada bebrapa orang Ollanda.

Soldadoe djawa dapet gadjieh lebeeh koerang dari pada soldadoe Ollanda. Apa sebab?

Soldadoe djawa dapet makanan tiada begitoe baik seperti makanannja soldadoe Ollanda. Mengapa?

Apa, sebab orang djawa seperti koeli tiada poenja oewang sampee per bisa beli makanan njang baik sedikit dan tiada bisa makan daging saben hari? Apa antara Ollanda sabeloonnja dia orang djadi soldadoe, saben hari makan daging? Orang djawa kan djoega soeka makan daging, sebab badannja kan bolee djadi koewat, sarta bisa menahan tjapik, djikaloo dia di kasi makan minoom njang baik?

(Ini samoeanja tjoema per pertambahan perkara sadja;) Tetapi mengapa soldadoe Ollanda di gandjari lain dari orang djawa? Apa sebab?

Apa ini 2 bangsa tiada sama djoega djadi hambanja Radja? Apa dia orang tiada sama djoega pegang pakerdja-annja kompeni sarta djaga satoe negeri? Apa dia orang tiada sama djoega pakee itoe pakean njang soeda di temtoeken oleh Radja? Apa hoekoemannja tiada sama djoega?

Mangka itoe, sebab hoekoemannja sama djoega, gandjaranja djoega moesti di samaken. Apa pelornja memoesooh tiada sama djoega makan dirinja orang djawa? Dan apa toembak oetawa klewangnja memoesooh begitoe djoega tiada bisa loekaken dia poenja koelit item?

Mengapa Sersant Veerman di kasihi bintang Willems-orde, njang beloon taoe bekin begitoe banjak apa njang Saridin sasoenggoenja soeda taoe bekin? Apa Saridin saben Dominggoe soeka mabook 2 kali? Apa Saridin soeka poekool bininja? Dan apa dia soeda taoe dapet oekoeman provoost? Trada sentara njang itoe Veerman ada antara ini katjatjatan, sebegitoe djoega djikaloo dia (Veerman) berdjalan di moeka roemah djaga, orang orang soldadoe di sitoe lantas kasi hormat pada dianja; per Veerman orang njang bediri djaga di tempat lelaboeng (Schildwacht) moesti lantas pikool bedilnja boewat kahormatannja; Veerman; dia dapet kahormatan betool sama djoega satoe opsir, trada sentara itoe orang orang tiada oesah kasi itoe kahormatan pada Saridin dengen pakee bintangnja perak di dadanja sarta pakee kelwangnja kahormatan di pinggangnja?

Mangapa itoe hal menghargakan dari pakerdja-an di lainken; krana apa itoe perbedahan?

Melingken sebab roepanja Saridin poenja koelit ada lebee item.

Mangka itoe Saridin tiada bisa berdamieken ingin akan hormatnja; mangka itoe di dalem hatinja lantas djoega, njang itoe Goperment, njang dia djaga dan toerooti tiada maoe kenal pada dianja.

[Bintang Timor no.46 1865 (10 Junij 1865), p.3]

Saridin poenja batalioon, sasoedanja abis peprangan njang di blakangan kali sekali, soeda di piendah ka Kedoong-kebo. Di-sitoe ada lagi satoe batalioon dan separonja bagian dari kompeni Artillerie. Njang djadi soldadoe di antara itoe batalioon ada roepa roepa orang, dan djikalook kita orang berdjalan di deketnja tangsi, baroe bolee denger njang ampir di satoe satoenja kompeni orang bitjara lain bahasa.

Di sabelahnja tangsi Ollanda ada pernah tangsinja orang Madoera, dan di deketnja tangsi Djawa ada 150 bidji orang Afrikaan njang djoega tinggal di dalem satoe kompeni.

Tiada melingken dari roepa dan bahasa, tetapi dari perboewattan djoega ada per-bedahan besaar sekali; njang satoe di kasi oentoeng lebee dari njang lain, dan njang lain di tinggiken dari pada lain lain orang; dari atoeran ini samoeanja Saridin tiada bisa mengarti.

Saridin betool baroe dapet satoe kommandant baroe di kompeninja; koetika ini kommandant bekin inspeksi (priksa) njang ka-satoe kalinja, dia dapet liat njang Saridin ada pakee sepatoe, sarta bertanjak pada Saridin: ,,Apa itoe mengartinja,” Beloon Saridin sampee bisa kasi menjaoot, dia soeda di soeroe masook di dalem tangsi per tjaboot sepatoenja. Itoe kapitein maoe pegang atoeran sarta bilang: ,,njang di loewar pakerdja-an djikalook dia (Saridin) maoe, bolee pakee sepatoe, tetapi di dalem dienst (pakerdja-an) tiada bolee.”

Soeda tiga kali Saridin dapet permissi per bolee pakee sepatoe, tetapi sebegitoe banjak kali djoega itoe permissi di tarik kembali pada lain kaptein.

Lain harinja Saridin naek djaga bersama sama satoe kopraal blanda item (aprikaan) bernama Kidjekroe; ini blanda item pakee sepatoe di kakinja njang besaar sarta kasar sekali, dan orang djawa djalan dengen kaki telandjang.

Waktoe soree banjak kalong terbang di atas itoe roemah djaga dengen kita orang tiada denger satoe soewara lagi di kampoong kampoong, melingken mendenger soewaranja satoe soldadoe njang tidoor telantang dengen menjanjie (repen).

Saridin lantas tanjak sama itoe Kidjekroe:

,,Apa kowee poenja negri djoega ada binatang kalong?”

,,Saia tiada taoe.”

,,Apa kowee tiada inget lagi di mana tempat kowee soeda di branaken?”

,,Ia.”

,,Apa namanja?”

,,Itoe saia tiada taoe.”

(Sebentar lagi, Saridin lantas teroosken pertanja-annja.)

,,Apa di negri maoe orang djoega pakee saroong?”

,,Temtoe tiada! kita orang berdjalan telandjang.”

,,Ada negrimoe ada seperti negri Djawa?”

,,Trada.”

,,Lapang oetawa banjak goenoongnja?”

,,Goenoong goenoong?”

,,Ja.”

,,Goenoong! O begitoe tienggi, djikaloo kita maoe mengliat oedjoongnja (mendangak) temtoe kita poenja topi djatooh.”

,,Apa betool, njang di dalem koewee poenja negri orang soeka pottong orang?”

Ini blanda item lantas hoendjooken giginja sarta menjaoot:

,,Djikalook ada pesta, temtoe!”

,,Apa koewee makan dagingnja orang?”

,,Tiada, tetapi tjoema minoom darahnja sadja.” Saridin dijem dengen berpikeer.

(Lebee 50 kali Saridin tanjak antara ini pertanjakan, dan slamanja soeda dapet menjaoot kembali pagimana njang soeda di sebootken di atas ini.)

,,Pegimana roepa koewee soeda bolee masook dan ambil dienst pada Goperment Ollanda?”

,,Itoe saija tiada taoe.”

,,Kowee tiada taoe?”

,,Tiada.”

,,Apa papamoe soldadoe?”

,,Saija trada bisa inget njang saija soeda mengliat saija poenja papa. — Saija oemoor 14 tahoon soeda lantas pigi angon binatang. Disana orang orang dateng, njang ada tiga garis di dahinja (batook-kepala) kita orang poenja bangsa tjoema ada doewa garis disini dengen doewa disini; sarta hoendjooken di mana pernahnja itoe garis dengen tangannja.”

Saridin tanjak: ,,apa lagi?”

,,Abisnja orang dari itoe bangsa soeda tangkep bebrapa dari saija poenja bangsa; sarta sebagian di poekool mati, darahnja lantas di minoom, tetapi saija dengen lain lainnja di tankep, dan di kireemken ka lain negrie di koelon; disana saija dengen saija poenja temen temen moesti bekerdja, dan hari hari berdjalan, sampee tiga taoon poenja lama!”

Saridin tanjak lagi:

,,Pagimana troosnja?”

,,Kita orang dateng di laoot deketnja di Elmina. Orang dari lain bangsa dapet sapoe tanga kapala, Ja .. banjak sekali begitoe djoega dapet banjak rum (arak) sarta pigi balik kembali; tetapi kita orang poenja bangsa di masooken di dalem benteng. Saija dapet pakean dengen sepatoe; sama ini bekakas saija tiada bisa djalan, sebab soeda biasa djalan telandjang kaki dari ketjil memang, mangka itoe saija moesti berdjalan pelan pelan.”

,,Abisnja?”

,,Koetika itoe, ada satoe kapal dateng; kita orang moesti naik di dalemnja dengen pigi brangkat.”

,,Apa djaoog?”

,,O, djaoo sekali, 100 hari, 200 dan 300 hari.”

Tiada lama koetika ini aprikaan abis bitjara ini perkata-an njang kablakang kali, lantas soldadoe djaga betreak: ,,in ’t geweer” (pegang sinapan) sebab Kapitein djaga dateng. Sasoedanja ini kapitein djaga priksa antara orang djaga (ronda) lantas itoe Kidjekroe, njang soeka minoom darahnja orang, tidoran di atas medja beserta minoom pipa.

Ini, roepanja orang, njang di samaken sama soldadoe Ollanda koelit poeti; njang dapet gadji lebee banjak dan makan lebee baik dari orang bangsa djawa!

Orang djawa kan tiada minoom darah; orang djawa kan berdjalan telandjang seperti orang item; orang djawa kan mengarti arganja manoesia, dan taoe atas hadat. Mengapa orang aprika-an ada lebee tinggi dari Saridin?

Apa, sebab orang item tiada tinggal di ini negeri Djawa? — Soengoe saija tiada mengarti!

[Bintang Timor no.47 1865 (14 Junij 1865), pp.2-3]

Atas ini samoeanja, Saridin beloon bisa dapet katrangan, apa njang mendjadiken sebabnja atas antara itoe perbedahan.

Seperti itoe orang bangsa Ambon, ada sebabnja, njang dia orang ada lebee tinggi dari bangsa djawa, sebab dia orang soeda masook Kristen; tetapi itoe orang Aprikaan boekannja Kristen, dan bermoelanja dia orang djadi boedak, mengapa waktoe dia orang djadi soldadoe ada lebee tinggi dari orang bangsa Djawa? Lagi koelitnja ada 20 kali lebee item dari orang Djawa.

Kaloo begitoe boekan dari roepanja koelit njang mendjadiken ini perbedahan; Soenggoe saia tiada bisa mengarti. Saridin tjarik lagi katrangan, apa njang djadi sebabnja atas perkara.

Dia bilang: djikaloo saia djadi Kristen, apa goenanja? orang Ollanda tinggiken orang bangsa Ambon, tiada sebab dia orang, orang Kristen, tetapi sebab dia orang di branaken di negri Ambon. Satoe orang Djawa njang masook Kristen djoega tiada dapet itoe per-oentoengan seperti satoe orang Ambon; dia slamanja tinggal djawa sarta njang paling sedikit arganja dari pada antara orang soldadoe.

Keparat itoe oentoeng njang soeda mendjadiken djawa diri saija.

Saridin tiada taoe njang itoe bangsa Ambon memangnja soeda oentoongnja per bolee di samaken sama bangsa Ollanda. Doeloe koetika negri Ambon djadi tempat kadoedoek-annja Kompeni njang paling besaar, antara pesoeroehan Indjil njang ada di sitoe soeda bekin segala kasoesahan per bekin Kristen antara itoe orang Ambon, sarta negri djoega soeda toeroot toeloong atas ini perkara soepaija bolee kedjadian. Satoe orang Ambon njang soeda djadi Kristen lantas di kasi beras pertjoema begitoe djoega pakean. Mangka dari ini sebab orang bangsa Ambon lantas dapet seneng hati per masook Kristen, sampee ada satoe waktoe itoe orang pesoeroehan Indjil dari banjaknja orang, moesti ambil satoe pompa per bolee bekin Kristen pada dia orang; banjak orang soeda menghoendjooken tiada kabetoelanja atas itoe perkara njang orang Ambon di bekin lebee tinggi dari lain lain orang bangsa Islam; tetapi sebegitoe djoega sampe ini waktoe itoe per-atoeran misi di tinggalken sebagimana adat lama.

Waktoe Saridin inget ini samoeanja, dia lantas dapet denger soewaranja satoe boeroong ,,Kokok-Belook” di blakangnja roemah djaga. Dia dengerken baik baik, dan koetika itoe boeroong beboeni lagi per kadoewa kalinja, lantas dia bangoon, sarta pigi di blakangnja itoe roemah djaga. Saridin dapet liat roepanja satoe orang prampoean, berpakee badjoe biroe, dengen saroong item, sarta moekanja tertoetoop dengen oedjoongnja slendang. Ini prampoean doedoek di bawahnja poehoon tjemara. Saridin poenja mata tlaloe tadjem soenggoe; di dalem itoe waktoe njang ada gelap sekali dia lantas kenal njang itoe pemandangan temtoe boekannja orang lain melingken dia poenja Sarina. Pelan pelan Saridin berdjalan kemadjoe dengen doedook di sabelanja dia poenja bini, sarta bertanjak:

,,Ada apa kabar, Sarina?”

,,Ia, ada kabar.”

,,Apa kowee dapat liat apa apa?”

,,Ia!”

,,Kaloo begitoe saija poenja pengrasa-an tadi, betool?”

,,Memang betool, Saridin!”

,,Bitjara dan Sarina?”

,,Satoe orang tiada ada njang tidoor di dalem tangsinja blanda item?”

,,Allah!”

Sarina berkata lagi “Banjak orang njang soeda memboeka soewara di dalem itoe tangsi; kowee taoe orang item tiada bisa bitjara dengen pelan.”

,,Kaloo begitoe kowee mengarti samoeanja?”

,,Samoeanja, tiada: sebab dia orang bitjara bahasanja sendiri; sarta ambil dia orang poenja sinapan dari tampatnja.”

,,Ada betool, Sarina?”

,,Soengoe, Saridin!”

,,Bolee saija pertjaija?”

,,Soenggoe, bolee!”

,,Apa kowee soeda denger lagi, Sarina?”

,,Saija denger soewaranja njai Bohassi, dia bitjara: djangan isi sinapanmoe, Bohassi!”

Lantas Bohassi menjaoot: “dijem, njai, apa kowee taoe, toewan kapitein moesti mati.”

Sasoedanja ini banjak orang lantas bitjara melaijoe.

,,Apa Kidjekroe djoega toeroot?”

,,Kidjekroe tiada maoe toeroot.”

,,Saija soeda kira djoega.”

,,Orang soeda soeroe pada njai Kidjekroe, per panggil lakinja dari pedjagan, tetapi dia tiada maoe. Bohassi lantas maoe antem. Njai Kidjekroe ambil satoe berang dengen berkata: ,,Tjoba antem sama saija.” Sasoedanja ini banjak soewara bitjara: ,,Djangan antem Sersant: per apa.” Lain soewara bilang lagi: ,,nyai Kidjekroe brani sekali!”

,,Sarina!”

,,Saridin!”

,,Denger betool saija poenja pesenan.”

,,Ia, Saridin, saija dengerken betool betool.”

,,Pigi lekas di roemahnja toewan kapitein Wolf, dan bekin bangoon pada dianja; bilang pada toewan kapitein: ,,njang orang item maoe bikin amook.” mengarti Sarina?

,,Mengarti Saridin.”

,,Pigi dan; begitoe djoega lowee moesti pigi di tangsi, dan bilang sama sersant majoor ,,njang blanda item maoe bekin roesooh.” kasi taoe djoega sama akoe poenja temen temen soepaija dia orang bolee sedia.”

,,Mengerti?”

,,Saija mengerti Saridin!”

,,Lekas dan, pigi!”

Sarina bediri, sarta berdjalan teroos di roemahnja kapitein Wolf.

Saridin berdjalan balik kembali di roemahnja djaga dengen pelan pelan; dia masook di kamarnja kommandant djaga, sarta boeka satoe trommel njang ada berisi obat. Dia bikeen bangoon antara temen temennja; orang item njang djoega toeroot djaga ada 4 njang bangoon dan doewa njang tidoor. Saridin bagi obatnja pada temen temennja.

Saridin kasi mengerti, njang dia orang djangan kaloot, dan moesti kaloewar pelan pelan.

Di moekanja tangsi, Saridin dapet liat banjak orang tetapi dia tiada bisa kenal, sebab gelap.

Saridin lantas betreak:

,,Werda!”

,,Saridin tiada dapet menjaoetan.”

Dia betreak lagi sekali:

,,Werda!”

,,Antara orang Aprikaan lantas moendoor, melinken Bohassi njang tingal di itoe tempat, lantas dia boeniken sinapannja; itoe pelor terbang di sebelah koepingnja Saridin.

Saridin lantas kommandeer:

,,Aan! vuur!”

Toedjoe sinapan beboeni sama sekali.

,,Laadt! (isi)

,,Soldadoenja isi sinapangnja kembali sarta djalan kemadjoe. Bohassi soeda tingal mati. Orang item lantas tesiar; separo bagian lari di loewar njang lain bagian masook kembali di dalemnja tangsi.

Saridin itoe waktoe dateng bersama sama banjak dari temennja, sarta pigi toetoop pientoenja dari itoe tangsi. Saridin bagi obat pada lain lain orang njang baroe dateng, sarta di mana mana tempat di tarookie satoe orang djaga. Tamboor beboeni, dan antara batalioon lantas kaloewar samoeanja. Soldadoe item soeda kasieken dia orang poenja sendjata. 37 orang ada koerang waktoe appel. Banjak orang patrol di kireem ka loewar per pigi tjari itoe orang orang, sarta soeda bisa dapetken djoega.

Banjak dari ini orang orang soeda di masooken di dalem boei; dan dari Saridin poenja hati hati, lagi sebab dia njang soeda taoe lebee doeloe dari ini perkara, mangka itoe, Saridin lantas di djadiken Letenant 2 Oleh Kangdjeng Goperment, sarta di pindah di Batawi.

Soengoe Saridin beroentoong memikool itoe kahormattan di atas poendaknja; sarta pakee itoe iket pinggang djingga, beserta pakee sepatoe bagoos.

Antara Letenant kasi tangan pada dianja; Boedaknja dateng dengen satoe koeda aloos; Saridin naek itoe koeda sarta pigi brangkat, dengen di anterken banjak dari temen temennja.

Saridin soeda brangkat lebee doeloe. Di bawanja satoe goenoong Saridin soeda soesool bininja; dengen brangkat bersama sama teroos ka Samarang, dan dari Samarang brangkat dengen Kapal api teroos ka Batawi.

Apa sekarang bolee di bilang Saridin poenja ka-oentoengan tinggal slamanja; dan apa Saridin soeda seneng atas kaoentoengannja? temtoe tiada. Di dalem 2 tahoon dia poenja antara ini samoeanja soeda mendjadi ilang. Waktoe Saridin djadi Letenant dia lebee lagi brasa, njang orang, djadi orang Djawa tlaloe tjilaka soenggoe; koetika dia djadi Letenant, Goeperment bikin pada dianja seperti satoe anak tiri (koewalon.)

Dia mesti idoop seperti satoe Letenant, dan moesti pakean seperti satoe Letenant, sebegitoe djoega dia tjoema dapet separonja gadjih, dan separonja oewang sewa roemah dari pendapetanja satoe Letenant Ollanda.

[Bintang Timor no.48 1865 (17 Junij 1865), p.3]

Sebab Saridin moesti mengadep di hadepannja orang orang banjak dengen moesti berpakee baik sedikit, mangka itoe dia rasa gadjihnja tiada tjoekoop per bolee idoop dengen patoot mangka itoe sebab, gadjihnja tjoema tjoekoop per kerdja beli pakeannja, dan dari katingalannja dia moesti kerdja per pengidoopannja sarta tinggal broemah di dalem satoe reomah di kampoong.

Dia djadi lid dari roemah bola tetapi terkadang sadja dia dateng, sarta di lain lain tempat dia tiada bisa oetawa bolee dateng sebab koerang oewang.

Mangka itoe dia moesti koempool sama bininja sadja; boeat koempool sama ambtenaar djawa, dia tiada maoe, sebab dia rasa: barang kali dia orang tiada soeka hati, tetapi sebegitoe djoega, dia timbang: sandenja itoe ambtenaar djawa maoe trima pada dianja, dan djkalook ini ambtenaar di dalem satoe waktoe maoe dateng pada Saridin, pigimana roepa dia moesti trima ini orang orang, krana dia tiada poenja apa apa.

Anem taoon dia moesti idoop begini roepa; waktoe dia djadi sersant dia rasa lebieh beroentoong; dia liat lain Letenant naek samoeanja dan dia slamanja tingal pagimana ada; mangka itoe dia lantas patah klewangnja sarta bientangnja dia boewang di tengah djalan sebab dia pikeer tiada ada goenanja lagi.

Saridin lantas di piendah di Soerabaija;

Waktoe dia ada di dalem kapal api, dia inget antara dia poenja kedjalanan dan antara itoe perbedahan sarta rasa njang orang, slamanja djadi orang djawa, tiada bisa oetawa bolee djadi beroentoong, djikaloo misi ada itoe perbedahan.

Mangka itoe, waktoe malem dia berdiri di pinggirnja kapal api, dan soeda djatoohken dirinja sendiri di dalem laoot.

Tiada ada satoe orang njang taoe Saridin poenja mati, tetapi waktoe pagi orang orang dapet liat bininja doedook menangis, sarta berkata koetika di tanja-ie:

,,Njang lakinja soeda ilang.” kasian soenggoe per Sarina.